Вялікая зала абласнога грамадска-культурнага цэнтра ледзь умясціла тых, хто ў розны час далучыўся да камсамольскіх спраў, а таксама пераемнікаў буйной маладзёжнай арганізацыі. З розных куточкаў Брэстчыны на абласное свята з’ехаліся найбольш актыўныя ўдзельнікі мала-дзёжнага руху. Вельмі цёплай і душэўнай атрымалася сустрэча пакаленняў 60-х, 70-х, 80-х гадоў…

Вядома ж, камсамольцаў былых не бывае, таму і праз дзесяцігоддзі ўжо паважаныя і дзелавыя людзі змаглі зноў адчуць сябе юнымі. Мікалай Басалай, Вячаслаў Салавей, Ларыса Дабрадомава, Міхаіл Куіш, Уладзімір Гетманчук, Віктар Валюшыцкі і многія-многія іншыя вядомыя сёння берасцейцы ў мінулую пятніцу ўспаміналі камсамольскую маладосць, абмяркоўвалі цяперашнюю дзейнасць Беларускага рэспубліканскага саюза моладзі і давалі наказ маладым. На сустрэчы былі таксама прадстаўнікі маладзёжнага беларускага руху 90-х гадоў і, безумоўна, цяперашні актыў абласной арганізацыі ГА "БРСМ”.

– Такая радасць убачыць адно аднаго з нагоды вялікага свята! – падзяліўся ўражаннямі намеснік старшыні аблвыканкама Леанід Цупрык. – На жыццёвым шляху нас аб’яднала вельмі важная агульная ідэя і высокія каштоўнасці, вернасць якім мы змаглі захаваць і праз гады. Цудоўна, што працягвае камсамольскія традыцыі годны пераемнік – Беларускі рэспубліканскі саюз моладзі. Гэта значыць, недарэмна мы прысвячалі сябе і былі адданыя любімай справе, якая жыве і ў сучасным свеце.