Жыццё моладзі не абмяжоўваецца вучобай або працай. Члены БРСМ уносяць пэўны ўклад у правядзенне грамадска значных акцый, з’яўляюцца ўдзельнікамі добрых пачынанняў. Напрыклад, у рамках акцыі "Моладзь. Традыцыі. Будучыня” юнакі і дзяўчаты наводзяць парадак каля помнікаў, абеліскаў і на прылягаючай да іх тэрыторыі. Шырокай папулярнасцю карыстаецца ваенна-патрыятычная гульня "Зарніца”. Пад эгідай БРСМ праводзяцца інтэлектуальныя гульні "Што? Дзе? Калі?”, "Брэйн-рынг” і іншыя цікавыя мерапрыемствы. Прапагандуючы здаровы лад жыцця, члены БРСМ удзельнічаюць у прафілактыцы правапарушэнняў. Словам, поле дзейнасці для ініцыятыўнай, неабыякавай моладзі шырокае. Разам з тым на канферэнцыі канстатавалася, што маладым людзям сёння трэба займаць больш актыўную пазіцыю па ўсіх пытаннях.

94 дэлегаты ад пярвічных арганізацый, якія створаны ў рабочых і вучнёўскіх калектывах, адобрылі дзейнасць раённага камітэта ГА "БРСМ", правялі выбары новага складу райкама, кантрольнай камісіі, выбралі дэлегатаў на абласную канферэнцыю, разгледзелі іншыя арганізацыйныя пытанні.
На пасяджэнні райкама, якое адбылося ў той жа дзень, першым сакратаром на новы тэрмін выбраны Аляксандр Ануфрыевіч Занька.

 

Мікалай ЛОЙКА.