Главная » 2010 » Сентябрь » 14 » Брестские студенты-стройотрядовцы помогли КПД
23:29
Брестские студенты-стройотрядовцы помогли КПД
Сёлетнім летам у складзе студэнцкага будаўнічага атрада 13 студэнтаў Брэсцкага дзяржаўнага тэхнічнага ўніверсітэта працавалі на КУВП "Ганцавіцкі КПД”. Кіраўніцтва прадпрыемства засталося задаволена іх работай.



Заўсёды адчуваю ўнутранае супраціўленне, калі чую разважанні аб тым, што сучасная моладзь інфантыльная, гультаяватая, непаслухмяная… Спіс адмоўных эпітэтаў, якія пры гэтым звычайна выкарыстоўваюцца, можна працягваць. На справе, можна сустрэць і старога чалавека, якога язык не паварочваецца назваць мудрым, працавітым ці самастойным, а сярод моладзі таксама нямала тых, пра каго народная мудрасць гаворыць: молада, ды не зелена. Гэтую выснову сваёй сумленнай працай пацвердзілі і 13 юнакоў, якія асвойваюць у БрДТУ спецыяльнасць "жалезабетонныя канструкцыі”, а летам прыехалі працаваць на КПД.

Упраўляючы ў вытворчасці па справе аб банкруцтве КУВП "Ганцавіцкі КПД” Мікалай Аляксандравіч Клімчук расказвае: "У нас працуюць фармоўшчыкамі дванаццаць студэнтаў ВНУ, якія перайшлі на 3-ці курс, і адзін майстар — студэнт-пяцікурснік Андрэй Яткоўскі, чалавек надзвычай адказны. Наогул, маладыя людзі не проста цудоўныя работнікі ўсе як адзін, але і разам складаюць дружную, згуртаваную каманду.

Мы былі здзіўлены тым, як хутка і непрыкметна студэнты ўліліся ў наш калектыў. Дзякуючы іх прыезду, ужо на наступны дзень мы змаглі арганізаваць на прадпрыемстве другую змену (да гэтага не хапала людзей). І варта адзначыць, што моладзь нас не падвяла: працавалі ўсе нароўні са старэйшымі, вопытнымі спецыялістамі. Акрамя таго, як заўважылі нашы пастаянныя работнікі, рабяты аказаліся цікаўнымі і ўнікалі ў тонкасці іх будучай спецыяльнасці, у арганізацыю працы на прадпрыемстве.

Такія людзі нам патрэбны. Мы ўжо зараз вядзём перагаворы, каб юнакі выбіралі тэмы дыпломных работ, звязаныя з нашым прадпрыемствам, прыязджалі да нас на практыку, а потым — і працаваць”.

Вось у такім падыходзе да справы — вылучыць лепшых, падрыхтаваць сваіх спецыялістаў — і праяўляецца, на мой погляд, найвышэйшая мудрасць кіраўніка, які жыве не сённяшнім днём, а думае пра будучыню. Як пазней расказаў начальнік вытворчасці А. К. Мелехавец, менавіта Мікалаю Аляксандравічу належыць ідэя запрасіць на лета студэнтаў. І хаця многія былі супраць яе, кіраўнік цвёрда настаяў на сваім: "Студэнтам быць!”. Нягледзячы на тое, што прадпрыемства доўга знаходзілася ў вельмі цяжкім становішчы і пакуль яшчэ не зусім трывала "стаіць на нагах”, для маладога папаўнення пастараліся стварыць самыя камфортныя ўмовы для пражывання і работы. Як аказалася — увага да рабят была не дарэмнай!

Начальнік вытворчасці праводзіць мяне па вялізных цэхах, паказвае рабочыя месцы сваіх падапечных і пастаянна засяроджвае ўвагу на тым, што юнакі не проста шчыра выконвалі свае непасрэдныя абавязкі, але і іншай неабходнай работы не цураліся: "Упершыню сустракаю такую згуртаваную, надзейную каманду маладых людзей, — непадробна захапляецца імі Аляксандр Канстанцінавіч і нібы чытае мае думкі: — Выдатныя хлопцы!”.

Шасцёра студэнтаў працавалі на канвеернай лініі, шасцёра — на касетнай вытворчасці. Працавалі ў дзве змены. Мы сустракаліся з імі ў перадапошні дзень перад іх ад’ездам з Ганцавіч. Спецыяльна дачакаліся перазменкі, каб сфатаграфаваць для газеты ўсіх разам, у кадр не трапіў толькі майстар Андрэй, які ў гэты дзень адсутнічаў па ўважлівай прычыне.

На пытанні, як ім працуецца, ці падабаецца, ці ніхто не крыўдзіць, дружна адказвалі: ”Усё падабаецца! Не крыўдзяць!”, і весела жартавалі: "Мы тут на малацэ ўзгадаваныя!”. А яшчэ запэўнівалі, што на наступны год пастараюцца абавязкова зноў прыехаць на КПД папрацаваць, і жадалі прадпрыемству хутчэйшага выхаду з цяжкага становішча.

Мне ж згадваліся словы антыкрызіснага ўпраўляючага Мікалая Клімчука аб тым, што першыя крокі да гэтага ўжо зроблены: нягледзячы на каласальныя затраты, на прадпрыемстве наводзіцца парадак, за ліпень тут упершыню папрацавалі з прыбыткам. І хаця страты на сённяшні час складаюць 78 мільёнаў рублёў з нарастаючым вынікам, аднак склад запоўнены прадукцыяй. Пасля яе рэалізацыі, якая, чакаецца, пойдзе больш актыўна напачатку восені, КПД атрымае добры прыбытак. Так што пажаданні студэнтаў — не пустыя гукі: яны асядаюць на жыватворную глебу ўмелага кіраўніцтва і сумленнай працы рабочых прадпрыемства, у якую ўнёс свой пасільны ўклад і студэнцкі атрад з БрДТУ.

Святлана ЛОКТЫШ.
"СП"
Просмотров: 1015 | Добавил: Alex
Яндекс.Метрика
Индекс цитирования